Главная » 2017 » Февраль » 27 » «Икки тыл -икки кынат»
09:56
«Икки тыл -икки кынат»

Олунньу ый 3-10 к. Мирнэй оройуонун Арыылаах нэһилиэгэр, Саха тылыгар аналлаах нэдиэлэ ыытылынна. Саха тылын учуутала А.М.Иванова-Айгыына иилээн-саҕалаан, үтүө, сонун көрүүлээх тэрээһиннэри ыытта. Оскуолабыт оҕолоро нууччалыы эйгэлээх буоланнар, нэдиэлэ икки тылынан ыытылынна. Ол да буоллар оҕолор саха тылын кэрэтин, ойуулаах-мандардаах буоларын ыытыллыбыт тэрээһинтэн биллилэр. Бу нэдиэлэ устата, оҕолорго анаан перемена аайы оһуохай тэриллэн, сахалыы араас оонньууларга кыттан оҕолоро муҥура суох үөрдүлэр. Ол курдук «Атаралаан», «Ойбонтон уулаан», «Көтөх ынаҕы туруор», “Хардаҕас суулларыыта” оонньууларга сөбүлээн кытыннылар. Маны сэргэ хас саха культуратын уруогар, кылаастар бары сахалыы остуол оонньууларын билистилэр, саха былыргы олоҕун сэһэргэстилэр араас үһүйээннэри иһиттилэр. Саха тылын нэдиэлэтин арыйыыга хоһоонньуттар бөлөхтөрө саха тылын туһунан аахтылар, саха пэттарын хоһоонноругар, П.Тобуруокап хоһооннорун ааҕыыга күрэхтэстилэр, оҕолор сахалыы остуоруйалары туруоран көрдөрдүлэр. Олус көхтөөхтүк 4 кылаас оҕолоро кытыннылар -кыл. Сал. В.К. Михайлова, оҕолор хоһоонноро диэн, остуоруйалара диэн, уруһуйдара диэн хас перемена ахсын оһуохайдаан тэйдилэр. Ону таһынан 6а кылаас оҕолоро, нэдиэлэҕэ анаан хоһоон үөрэтэн аахтылар, аһаҕас уруоктарга көхтөөхтүк кытыннылар, кыл.сал. В.А. Дмитриева. Бу тэрээһин саҕаланыаҕыттан бүтүөр диэри оҕолор П.Тобуруокап уонна саха суруйааччыларын кинигэтин быыстапкытын көрдүлэр, аахтылар, сэҥээрдилэр. Ити курдук икки тылынан саҥарар оҕолор саха тылын күүһүн, кэрэтин саҥаран -иҥэрэн, оонньоон биллилэр-иһиттилэр. Инникитин да маннык тэрээһиннэри нэдиэлэнэн эрэ буолбакка, оҕолорго билиилэрин кэҥэтэр араас оонньуулары, күрэхтэри ыыта турар ордук буолуо этэ. Оҕо төһө да эйгэтин батыстар, сахалыы саҥатыттан, сахалыы толкуйуттан оҕону хаалларар сатаммат.

 

Акулина Иванова-Айгыына, СӨ Суруйааччыларын чилиэнэ, саха тылын уонна литературатын учуутала.

Просмотров: 100 | Добавил: school6arilax | Рейтинг: 0.0/0
Всего комментариев: 0
avatar